「阿明，我有一個好簡單嘅方法就可以接觸到未來人!」
我停止手上嘅轉珠，好唔耐煩咁對住偉亮講:「嘜Ｑ未來人呀!?」
偉亮隨即搬出一大盒嘅箱，然後打開佢，箱內有幾幾張一百蚊紙，一個鐵盒，一張地圖，一部陳年Nokia手機，同埋幾張白紙。
「就憑你依埋野就可以見到未來人!?」
偉亮好認真咁同我講:「要見未來人好簡單!嗱!你聽過『蝴蝶效應』未?」
「聽過，類似咩過去所做嘅野會影響到未來咁囉!」
偉亮聽到後即刻啪一啪手指，然後興奮咁講:「Exactly!我地依家所做嘅每一個動作都會係未來製造出唔同嘅事!」
我依然唔係好明佢講緊咩，但佢又好似好有信心咁，於是我就陪佢癲下:「咁姐係點呀?」
「真係好簡單!假設我地真係有未來，而我地未來可能已經有時光機，佢地可以利用時光機返嚟我地依個年代，所以我就準備咗一個鐵盒，我寫咗我係屬於咩年代嘅人，約左佢喺某個日期，某個地點見面，為咗怕佢唔識路嚟，我留低張地圖比佢，仲有啲錢方便佢搭的士，再唔識嚟又可以用部手機打比我!咁未來人喺將來十幾年又好，百幾年又好，如果個鐵盒無事嘅話，咁未來人一定會見到!咁佢地就會嚟同我地見面!」
我望住堆九唔搭八嘅野，再望一望偉亮，不禁說:「你都幾落重本喎!又幾百蚊又有電話喺到!」
「區區幾百蚊同部廢機有咩所謂，咪當實驗玩下囉!嗱!堆野我一早寫好哂，Plan好哂路線，聽日我就放喺海洋公園!你有冇野想寫低問一問未來人?」
「咪住先......點解要放喺海洋公園?唔放喺我地屋企?」
「我地依啲垃圾公屋都唔知喺未來會唔會比人移平，到時鐵盒可能無咗，海洋公園斷估唔會有事怪!」
「哦......又好似幾有道理。」於是我好認真咁問一問自己，有咩野問未來人呢?問佢2017會唔會普選?下屆仲係咪梁振英? 但好似好怪咁，如果佢真係百幾年後嘅未來人，我咁問法同有人問我清朝邊個做皇帝一樣，諗諗下都係算，就陪偉亮去咗收埋個鐵盒。
第二日，偉亮帶咗我去屋企附近觀塘某工廠大廈，偉亮話人少方便見面喎。
「你約咗佢幾多點?」我估唔到我陪佢癲到依個地步。
偉亮心情似乎有啲緊張，手汗都出埋，既興奮又擔怯咁對我講:「約咗兩點，喺依度見面。」
我望一望手錶，顯示為一點五十分。好快就會知依個『實驗』究竟Work唔Work。
等咗十分鐘，時間為兩點正，我都比偉亮整到心情有啲緊張，不斷望下周圍有冇神秘人出現，但最後都係失望。
再等咗一個鐘，一切如常，咩事都無發生，見到偉亮由期待緊張變咗灰灰地個樣，唔知點解有啲覺得佢好可憐。
「算喇，可能個鐵盒係未來已經爛咗，未來人睇唔到!我地返去喇!」我試下安慰佢。
偉亮聽到我咁講都心死，死死氣話去埋個廁所先走，於是我就留喺度等佢。
大約一分鐘左右，偉亮出返嚟，一直低頭不語，我見佢受咗咁大打擊都唔敢再撩佢，於是我就話:「等我帶你去食好野喇!」
踏出大廈後，電話響起，來電竟然係偉亮，我即刻聽:「喂?」
「去咗邊呀!又話等我!依家又唔見咗人!」電話傳來偉亮聲音。
我個心即刻寒咗一寒，我慢慢轉身望一望身旁個偉亮，只見偉亮笑笑口問我:「又話帶我食好野嘅?」
究竟電話入面嗰個係偉亮，定係我身旁嘅人係偉亮?
電話入面提到 "又話等我" 意思係等偉亮去完廁所出嚟定係"明明約好咗未來人，而我地無等佢呢"
我握緊電話，膽粗粗咁問:「你係......」
嘻
《完》
Search